Arrasate Euskadiko birika industrialetako bat dela esan du Itxasok loreak banatzen hasi aurretik egindako adierazpenetan eta industriaren garrantzia azpimarratu du. Aldarrikatu du Idoia Mendia lehendakari ordearen eskutik egindako lanari esker dela langabezia tasa hemen Espainiako baxuena baina oraindik egiteko asko dagoela, esaterako banketxeei, Kutxabank eta Laboral Kutxa tartean, inbertsio gehiago egin ditzaketela industria gehiago errotu dadin.
Industriaz gain, trantsizio energetikoaren garrantzia ere aipatu du Ixasok. Apirilaren 21ean egingo diren Legebiltzarrerako hauteskundeei begira, alderdi sozialistaren gidoia sozio-ekonomikoa dela esan du Gipuzkoako zerrendaburuak Jose Mari Arizmendiarrieta plazan, kezkak espazio horretan daudelako, eta eurek egonkortasuna defendatzen dutela.
Arrosak banatzeko ekitaldian, Denis Itxasok ondoan izan ditu, besteak beste, Gipuzkoako zerrendan hirugarren doan eta Antzuolako zinegotzi izandako Miren Gallastegi, Rafaela Romero arrasatearra eta bertan egun zinegotzi den Yoana Sanchez.
