Intxorta 1937 Kultur Elkarteak kaleratu du Tortura Arrasaten, genero ikuspegitik liburua. Nerea Ayensak jaso ditu testigantzak, eta Iñaki Barrutia psikologo klinikoak osatu du marko teorikoa. "Testigantza gogorrak dira. Torturaren kutsu sexista jasotzen duten lan gutxi daude, eta badago zer kontatu. Beste edozein herritan egin daiteke ariketa bera", dio Ayensak.
Xantaia emozionala, mendeku politikoa, indarkeria sexualak… denetik jaso dutela azaldu du Barrutiak. "Lekukotasuna eman duten emakume gehienek izan dute trauma osteko estresa: lo egiteko zein kontzentratzeko arazoak, oroitzapen errepikakorrak, beldurrak... baina nik erresilientzia nabarmenduko nuke: torturatik bizirik atera dira". Emaitzarekin pozik daudela esan du Intxorta 1937 Kultur Elkarteko Juan Ramon Garaik. "36ko gerran errepresaliatuak eta erailak izandako gure senideekin ez da oraindik justiziarik egin, eta geroko erresistenteekin ere ez da egin; ez da egia osoa ezagutzen".