Egunari hasiera emango diote 12:00etan Kulturateko areto nagusian, Egindakoaz harro goazen haratago ekitaldiarekin: "Gure urteurreneko leloarekin bat etorriz, ekitaldi hau antolatu dugu 40 urte hauetan egindako lana aitortu eta gaur egun egiten duguna zein aurrera begira ditugun erronkak plazaratzeko".
Ekitaldia amaitu ostean, 13:00etan, kaleak hartuko dituzte Seber Altube plazatik hasiko diren ibilbideekin. Alde batetik, erraldoien eta kilikien konpartsa ibiliko da kalea alaitzen. Bestetik, "bermut magikoa" antolatu dute Kidam magoarekin, bere magiaz gozatzeko aukera egongo da herriko kaleetan zehar. Horrez gain, bisita gidatua egingo da Anabel Ugalderekin Arrasateko alde zaharrean; azken ekintza honek plaza mugatuak izango ditu eta aurrez izena eman beharko da, AEDn.
Baba-jana Uarkapen
Ondoren, bazkaria etorriko da, 14:30ean. Baba-jana antolatu dute Uarkape pilotalekuan. Txartelak salgai egongo dira azaroaren 8tik aurrera AEDren bulegoan, Monten eta Iratin. Helduen txartelak 15 eurotan salduko dira eta 12 urterainoko haurren kasuan, 10 eurotan: "Nabarmendu nahi dugu, baba-janean begetarianoentzako aukera izango dela, izan ere, izango dituen gehigarriak (sakramentuak eta aza) banatuta egongo dira bakoitzak nahi duena hartzeko aukera izan dezan. Horrez gain, gazta eta irasagarra izango ditugu postre moduan. Ohar bezala, azaldu nahiko genuke edariak ez direla barne egongo eta hauek erosteko aukera izango dela frontoian bertan".
Bazkaloste umoretsua ere izango dute Uarkapera bertaratzen direnk, Bea Egizabalekin eta Klownklusioak izeneko bakarrizketaz gozatzeko aukera egongo da-eta. Eta urteurren festarekin amaitzeko, DJ Goiko-ren txanda iritsiko da: "Bere musikaz girotuko du pilotalekua; auzolanean bazkarikoa jasoko dugu eta eguraldiak laguntzen bagaitu, kalera joango gara kalejiran guztiok batera. Horrela emango diogu amaiera egun berezi honi. Deia egin nahi diogu Arrasateko euskaltzale orori AEDren urteurreneko jaian parte hartu dezan eta guztien artean giro apartean egun berezi hau ospatu dezagun".