Egitarau zabala antolatu dute aurten ere Gaba Baltzaren testuinguruan, eta astelehenean hasiko dituzte lehen ekintzak. Batetik, urriaren 23tik azaroaren 1era, erakusleiho lehiaketa antolatu dute, Ibai-arteren eskutik. Honako denda hauetan jarri dute erakusleihoa: Altuna Lurrindegia, Arrasate Optika-Optometria, Bea Lentzeria, Beinke, Elkoro Osagarriak, Ennea, Intersport Loramendi (Garibai), JG Inpresio Digitala, Kapikua, Kids&Us, Kili-Kolo, Kolore, Milar Elkoro, Portaloi Optika, Resusta Karrikiri, Sustrai eta Toñi & Sandra.
Erakusleiho gustukoenaren aldeko botoa emateko, 688 73 41 49 telefonora idatzi beharko da. Erakusleiho onenaren saria 300 eurokoa izango da, Ibai-arten gastatzeko, betiere, eta bigarren saria, berriz, 200 eurokoa. Halaber, bozkatzen dutenen artean 100 euroko bonua zozkatuko dute.
Bestalde, urriaren 23tik 27ra, Arrasateko Udal Ludoteketan Gaba Baltzaren inguruko hainbat ekintza egingo dituzte (bazkideak diren haurrentzat). Modu horretan, sukaldaritza tailerraz, eskulan girotuez, ipuin kontaketez eta abarrez gozatzeko aukera egongo da.
Urriaren 28an eta 29an, halaber, 12 urtetik gorako nerabeentzako, ihes bidea eta beldur etxea egingo dituzte tren geltoki zaharreko gaztelekuan, Gaztetxokoen eskutik. "Sarrera mugatuak dira, eta hauek, gaur hasi eta domekara arte, tren geltoki zaharreko gaztelekuan lortu ahal izango dira".
Urriaren 31, egun berezia
Bestalde, antolatzaileek aurreratu dute urriaren 31 egun berezia izango dela. "18:00etan hasita, Arimen Biltzarra egingo dugu Arrasateko kaleak girotuz. Biteriko plazan hasi eta Monterronera ibilbide bat egingo dugu Ilargitxo eta bere lagun kukumarruekin. Hori horrela, herritarrak animatzen ditugu Kukumarroz edota baserritarrez jantzi eta kalera ateratzeko, guztion artean herria alaitu eta jai giroan gozatzeko", azaldu dute.
Ostean, Ekin Emakumeak Elkartearen eskutik, Bizitzaren Jaia egingo dute 21:00etan, Sonyaguar Fuegorekin, elkartearen lokalean (Pablo Uranga, 4). "16 urtetik aurrerako emakume* eta genero disidenteentzako espazioa izango da", azaldu dute. Izena emateko, lokalera bertara joan edota 651 70 79 36 telefonora deitu beharko da, gaurtik urriaren 30era arte. Kontutan hartu izen-emate mugatuak izango direla.
Eguna amaitzeko, Ttak gazte taldearen eskutik, herritar guztientzako DJak egongo dira gaztetxean, 22:30ean hasita: DJ Karapaixo, DJ Expuela eta DJ Pibikens. Sarrera doakoa izango da.
Parte hartzeko deia
Gaba Baltza batzordea osatzen duten eragile guztiek herritarrei dei egin diete egitarauan parte hartu eta ondo pasatzera.