Lehen hitzordua hurrengo astelehenean izango da: belaunaldiz belaunaldi oroimena nola transmititu den aztertu gura duen eta gerrako umeak protagonista izango dituen tailer bat, hain zuzen ere.
Erresuma Batuko hainbat akademikok, Basque Children elkarteak eta zenbait artistak osatzen duten Belaunaldien arteko memoriaren transmisioaren lantaldearen eskutik egingo dute tailerra: Monika Jatok gidatuko du, eta Judith Martinez Estradak ere hartuko du parte bertan.
Torturaren gaia ardatz hartuta, iazko Donostia Zinemaldian aurkeztu ziren bi dokumental ere eskainiko dituzte: irailaren 14an, Jon Mikel Fernandez Elortzaren Bi arnas, eta irailaren 21ean, Ander Iriarteren Karpeta urdinak. Bi emanaldiak Juan Arzamendi Musika Etxean izango dira, 18:30ean, eta bietan zuzendariek ere hartuko dute parte.
Eta nola ez, irailaren 26rako ere prestatu dute ekintzarik.
Ekintza hauek guztiak aurkezteko egin duten prentsaurrekoan, Maider Morras alkateak eskerrak eman dizkio Intxorta 1937 kultura elkarteari, baita egiten duen lanaren garrantzia azpimarratu ere. Eta herritarrak ekitaldietan parte hartzera animatu ditu.