16 eta 18 urteen arteko kategorian Arizmendi Ikastolako ikaslez osatutako Gu geu sortzaile taldea izan zen saritua, Berlinera joateko bidaia poltsikoratuta. Hirukoteak alzheimerrean jarri du arreta azken hilabeteotan. Harkaitz Leturiaga ikasleak azaldu duenez, lau aplikazioz osatutako produktua osatu dute "inguruan oso zabalduta dagoen gaixotasun honi aurre egiteko".
19 eta 24 urte arteko kategorian, berriz, Olatu berdea iruditu zaio epaimahaiari proiekturik onena. Hala, Estatu Batuetara bidaiatzeko txartelarekin egin dira. Maddi Izkue zarauztarra da taldeko kideetako bat, eta aipatu duenez, kutsadurari aurre egin eta mugikortasuna sustatzeko helburuarekin egin dute lan, aholkularitza bat sortuta eta udaletxe ezberdinekin batera lan eginda.
Nazioarteko partaidetza
Originaltasunaren saria, ostera, Alemania eta Belgikako Team smart taldeak eraman du. Aurten, denera, 108 taldek hartu dute parte, tartean Malaysia, Tanzania, Estatu Batuak eta Kolonbiakoek, enpresa-kudeaketan gaitasunak eskuratzeko helburuarekin. 20 talde onenek aste osoa igaro dute Arrasaten, txapelketa antolatu duten eragileen eskutik askotariko jarduerez gozatuz eta enpresa kooperatiboen funtzionamendua gertutik ezagutuz.
