Lau urte luze joan dira opera ikuskizunik gabe Arrasaten, eta jendea gogotsu dago. Horren adibide, sarrera ia guztiak salduta daudela. Dena den, Ozenki elkarteak azken orduko sarrera kopuru txiki bat jarri du salgai Maala kalean dagoen Altuna lurrindegian. Horrela, Turandot ikusi nahi dutenak hara gerturatu beharko dira azken txartel horiek eskuratzeko.
Musikari handiak
France Dariz eta Chystelle di Marco soprano frantsesek gorpuztuko dute Turandot, eta David Bañosek eta Eduardo Sandovalek emango diote bizia Calafi. Taldea Francesca Bruni (italiarra) eta Yeonjoo Park (Hego Koreakoa) sopranoek itxiko dute, Liuri bizia emateko.
"Egun horretara arte, ezin izango dugu zehaztu zein interprete igoko diren Amaiaren agertokira, baina denak dira lirikako figura handiak", azaldu du Ozenki elkarteko kide Manu Gallardok. Horiekin batera jardungo dute Opera 2021 konpainiaren orkestra sinfonikoa eta Siziliako Abesbatzaren hogeita hamar ahots.
Musika ikuskizuna bi zatitan banatuta egongo da, eta 15 minutuko atsedenaldia izango du.