Irakasleen artean, Miren Gaztañares, Maria Pilar Etxebeste, Charo Gomez, Libe Mendizabal, Arantza Alonso, Mertxe Madinabeitia eta Jesusi Etxebarria izan dira solasaldian eta hasierako ikasleen ordezkaritza osatu dute Luis Usatorrek eta Javi Egidazuk.
Lehen irakasle horietako bat izan Libe Mendizabal. "Denda baten egiten nuen lan eta bertara etorri ziren klaseak emateko proposamena egitera. Dendan egiten nuenez lan egunean hiru orduz bakarrik joaten nintzen klaseak ematera. Gustura ibili nintzen sei urtez klaseak ematen baina gero bosgarren semea izan nuenean ezin izan nuen klaseekin jarraitu, ez nuen denborarik".
Metalurgika-n hasi ziren klaseak ematen, gaur egun Mankomunitatea dagoen lekuan. "Egoera oso prekarioa zen, ez zegoen instrumenturik eta paretak izugarri finak ziren. Instrumenturik ezean, solfeoa bakarrik ematen genuen hasieran. Aprendices-era aldatu ginenean asko hobetu ziren gauzak". Amaitzeko, Mendizabalek azpimarratu du hasierako irakasleetako batzuekin harremana mantentzen duela oraindik: "Polita izan da solasaldirako elkartzea baina Arrasaten bizi garenez oraindik ere askotan egotan gara".