Arrasateko Udalak Zigarrolako balkoia herritarrentzako aisia-gune bilakatzeko lanak K1 Ekopaisaia S.L.L. enpresari esleitu dizkio. Enpresa horrek lurrak berdinduko ditu behatokiaren inguruan, beheko zelaian; mahai eta bankuz osatutako bi eremu jarri; motordun ibilgailurik ez igotzeko itxitura bat egin bidearen hasieran; Udal naturabide-sarearekin lotzeko bost seinale kokatu; baranadaila eta panel informatiboa jarri; eta jada egokituta dauden bankua, mastila eta ikurrina berriztu. Aurreratu dutenez, lanak gaur, astelehena, hasi dituzte, eta datorren asterako bukatzea espero dute.
Proiektu beraren baitan, azken asteotan 2.000 metro karratutan pilatutako sasitza kentzen aritu dira Basolan basolangileen formazio taldeko kideak. Talde hori Lanbide eta Udalaren arteko enplegu formakuntza programaren bitartez sortutakoa da.
Zigarrolako balkoia Kurtzetxikiko magalean dago kokatuta; zehazki, Musakola/Zigarrola auzoan dagoen autobideko obrei lotutako betetze batean, autobidearen goialdean. Duela urte batzuk Musakolako lagun talde batek tontortxo horren inguruak egokitu zituen begiratoki izaera emateko.