Lezetxiki eta inguruak babestu, AHT gelditu! lelopean hainbat herritar batu dira gaur eguerdian Arrasaten. Hala, 2006an eraikitzen hasi ziren Abiadura Handiko Trenak, bai paisaian eta bai ekosistemetan, konponezinak diren kalteak eragin dituela salatu dute. Trena eraikitzeko erabili diren argudioak "gezur hutsa" direla ere defendatu dute, eta gaineratu, "ez dela inoiz ez jasangarria ez errentagarria izango. Ez dela inoiz energetikoki efizientea izango, ez duela errepidetako trafikoa murriztuko, ez duela onura ekonomikorik ekarriko, ez duela merkantziarik garraiatzeko ahalmenik izango eta ez gaituela Europako beste eskualdeekin hobeto komunikatuko".
Gaur plazan elkartu dituen Lezetxikiko kalteak "izotz-mendiaren punta" besterik ez direla argitu dute: "Azpitik, Euskal Herrian inoiz egin den eraikuntza suntsigarri, antisozial eta xahutzaileenak, bere bidea egiten jarraitzen du". Hala, mobilizatzeko dei egin dute eta erakunde publikoei, ondarearekiko dagozkien babes neurriak har ditzatela eskatu.
