Asteburuan sare sozialetan zabaldu den bideoaren egilearekin jarri da harremanetan GOIENA. Bertan, ustez AHTko obren ondorioz Lezetxikiko Leibarreko kobaren barrualdean izan diren kalteak ikusten dira. "Joan den zapatuan grabatu genuen bideo hori, eta bai, berretsi genezakeena da AHTko obrek sortutako kalteak daudela bertan. Kobazuloaren barnealdean hartutako irudiak dira horiek, Ikurrina dagoen galeria baino barrurago", adierazi diote GOIENAri
Leibar, balio arkeologiko handia duen kobazuloa
Hain zuzen, Leibarreko kobazuloan aurkitu zuten, duela mende erdi pasatxo, Atapuercako aztarnen ondoren penintsulan aurkitu den giza aztarna zaharrenetako bat, 164.000 urte inguru zituen 30-35 urte bitarteko emakumezko baten besahezurra. Jose Migel Barandiaranek eta bere lantaldeak egin zuen aurkikuntza hori. 60ko hamarkadan iritsi zen Barandiaran Lezetxiki inguruetara, inguruak aztertzeko asmoarekin. Eta, Barandiaranek eta haren aginduetara zeuden langileek 1964an egin zuten Euskal Herriko arlo horretako aurkikuntza nabarmenetako bat, lehen aipatutako emakumezko baten besahezurra. Eta, hain zuzen, lan horietan laguntzaile moduan ibiltzen zen Gesalibarko Felipe Leibarren urtebetze eguna zenez, ordutik kobazulo hori Leibarko kobazulo moduan da ezaguna.
Hala, urte askoan zehar, Alvaro Arrizabalaga arkeologoa buru, EHUko ikasleek indusketa lanak egin izan dituzte Lezetxikin bertan, eta herritarrendako bisita gidatuak, eta erakusketak ere egin izan dira, bertako aurkikuntzak erakusteko.
Lezetxiki, babestutako ondare kulturala
Bada, Eusko Jaurlaritzak iazko ekainean eman zien, Lezetxikiri eta inguruei, babestutako ondare kulturalaren izendapena: "Eremu horietan baimenduko diren erabilerak zientifikoak eta kontserbazioaren arlokoak izango dira, bai eta ondasunari balioa ematearen ingurukoak ere, baina, azken kasu horretan, soilik zabalkundeari dagokionez".
