Debagoieneko osasungintzako langileek, ESK eta LAB sindikatuen babespean, Arrasateko ospitalea zuzentzen dutenen "jarrera" eta "lan eremuko tratu txarrak" salatu dituzte. "Osakidetzako Giza Baliabideen Zuzendaritzaren abalarekin eta bultzadarekin, zuzendaritzak langileriari egiten dion estortsio sistematikoa salatu nahi dugu, zeinak profesional kualifikatuak gure ospitaletik ateratzea eragin baitu", azaldu dute.
Zehaztu dute, azken astean, kontratu egonkorra duten bi langilek ospitalea uzteko erabakia hartu dutela. Horietako bat da Roberto Sanchez medikua. "Min egiteko jarri dizkigute guardiak –sei asteburu jarraian izan ditut–; espedientea irekitzearekin mehatxatu gaituzte; grebak egin ditugunean, zerbitzu minimoak ikaragarriak ziren... Egoera honengatik jazarpen protokoloaK aktibatu genituen, baina Osakidetzak, ikertu beharrean, gehiago zapaldu gaitu eta espedienteak ireki", esan du Sanchezek.
Sindikatuek diote "urteetako presioa eta jazarpena" pairatzen dutela langileek, eta zuzendari medikoa "kargutik kentzeko" eskatu dute.
Egoera honen aurrean, Osakidetzak oharra kaleratu du eta bertan Debagoieneko Ospitalearen kudeaketa "babesten" duela azaldu: "Osakidetzak langile guztiak berdin tratatzen ditu, eta erabat faltsua da Debagoiena ESIko profesional bat bera ere diskriminatzen edo estortsionatzen ari dela".
Ospitaleko zuzendaritzak, bestalde, ez du adierazpenik egin nahi izan.
