Atzo, eguena, pintxo-potea egin zuten, baita afariak eskaini ere. Otorduak ematen jarraituko dute ostiral eta zapatuko gauetan. Egun horretan, gainera, bazkaltzeko aukera egongo da karpa barruan. Eta garagardo azoka denez gero, ezin falta edari hau ere.
Ekitaldi kulturalek girotuko dute gunea. Atzo Leire Etxezarreta eta Pello Heriz igo ziren oholtzara, eta 22:30ean, Doce C Klik rap-kantariaren txanda izan zen. Gaur, egubakoitza, gaueko 22:30ean, Sin+ talde beteranoak joko du kontzertua eta zapatuan, azkenik, AZ Gaubelakek musikatuko du azoka, ordu berean hasita. Horrez gain, umeentzako aurpegiak margotzeko eta txapak egiteko txokoa jarriko dute gaur arratsaldean. Era berean, Pook taldeko kideek diseinatutako murala margotuko dute, Mojategiko sarreran jartzeko intentzioarekin.
Erakusketa Kulturaten
Herriko plazatik kanpora ere prestatu dituzte ekintzak ART-koek, Kulturateko klaustroan atzera begirako erakusketa bisitatu ahal izango delako ekainaren 18rarte. Denbora lerro moduko bat egin dute, argazki eta arropekin mugarri garrantzitsuenak aipatuta.
Zapatuan Herensugeek, Rugby Taldeko beteranoek, partidua jokatuko dute zapatuan Mojategin, Hernaniko beteranoen aurka.
Azaldutako guztia gutxi ez eta udazkenera begirako ekintzak ere antolatzen hasiak dira, besteak beste, plakaketa gabeko Touch Rugby txapelketa edota umeentzako errugbi eguna, puzgarri eta bestelakoekin.
