690 metro dituen trazatua gaur goizean inauguratu dute, eta dagoeneko erabilgarri dago erabiltzaileentzat. Ander Iturri Gipuzkoako Foru Aldundiko Mugikortasuneko zuzendaria pozik agertu da egin den lanarekin. Era berean, balioa eman dio Debagoienean egin den bizikleta bidezko eta oinezko mugikortasunaren aldeko apustuari. Bere hitzetan, "egoera soziosanitarioen ondoriozko erabilera berrietara egokitutako mugikortasun ziklistako azpiegiturak ere sustatzen ditugu".
Ander Garay zinegotziak adierazi du helburu nagusia dela "ibilgailuek duten inpaktua murriztea eta mugikortasun-aukera berriak sustatzea". Mugitzeko bizikleta aukeratzen duten herritarren mugikortasun seguruaren alde egin du, Arrasaten egin diren beste proiektuei keinu eginez; tartean, ekobulebarra, Leintzibar-Foruen etorbideko bidegorria edo Araba etorbidea.
Victor Fuentes zinegotzia ere pozik agertu da bidegorriaren proiektua errealitate bihurtu delako eta aspalditik bizilagunak egiten ari diren eskaera bati erantzuten diolako. Bere hitzetan, "Kataideren kasuan, lagunduko du trazatu hau modu seguruan erabiltzen eta bizikleta garraiobide bideragarri eta seguru gisa sustatzen".
2019an lotu zuten akordioa Arrasateko Udalak eta Gipuzkoako Foru Aldundiak Kataideko bidegorria egiteko. 2020an ziren hastekoak lanekin, baina zenbait arazo administratiboren ondorioz eta pandemia tarteko, 2022ko otsailean ekin zituzten. Zorua egokitu eta zabaldu, espaloiak nahiz zintarriak konpondu eta seinaleztapena zein argitasuna hobetu dituzte, 300.000 eurotik gorako inbertsioarekin. Finantziazioaren %100 Gipuzkoako Foru Aldundiak hartu du bere gain.
