Mondragon City Challenge ekintzailetza kooperatiboko nazioarteko lehenengo lehiaketa da. Lehenengo edizioaren arrakasta ikusita, bigarrena egingo dute laster: irailean zabalduko da izena emateko aldia.
Hori horrela, atzo goizean, Arizmendi ikastolako gazteekin saio berezia egin zuten Garaia Parke Teknologikoan. Mondragon Kooperatibako ordezkariak, Konfekoop-eko presidente Rosa Lavin, Euskadiko Kooperatiben Goren Kontseiluko idazkari nagusi Belen Balerdi eta Jaurlaritza eta Aldundiko ordezkariak izan ziren bertan, besteak beste; baita Maria Ubarretxena Arrasateko alkatea ere eta hainbat gazte ekintzaile, beraien esperientziak kontatzen.
Sustatzaileen esanetan, atzoko saioaren helburua Arizmendiko gazteak "eredu kooperatibora gerturatzea" eta eredu hori "etorkizuneko aukera izan daitekeela erakustea" izan zen.
