Arrasateko udaletxean egingo zaie harrera hilaren 27an. Ondotik, askotariko proiektuak erakutsiko zaizkie; hala nola, Fotovoltaikoak etxean egitasmoa, Ekiola proiektua, Debagoiena 2030 proiektuaren energia portfolioa, Mondragon Unibertsitateak Ederlaneko labeen beroa baliatuz ezarri nahi duen berotze sistema, edo eskualdeko kooperatiben ekosistema. Arrasateko alkate Maria Ubarretxenak uste du halako topaketak garrantzitsuak direla, eta trantsizio energetikoa ekidin ezinezko erronka dela. "Trantsizio energetikoa urruti gelditzen den kontu bat da agian batzuendako, baina bai edo bai datorren kontu bat da eta aurre egin beharrekoa, eta herri moduan Arrasatek ere badu bere ardura gai honetan. Tokatzen zaigu Europako programa horren baitan kanpoko bazkideei erakustea Arrasaten eta bailaran zer egiten dugun honen inguruan".
Irteerak eta bisitak
Irteerak eta bisitak ere egingo ditu nazioarteko ordezkari taldeak. Esaterako, Kulturola eraikina, Ikerlan edota Emaus ekozenterra bisitatuko dituzte. Hainbat dira trantsizio energetikoaren bidean urratsak emateko lanean diharduten eragileak gurean. Gaurko ekitaldian izan dira, esaterako, Ekiola elkarteko Amagoia Barandiaran, Fotovoltaikoak etxean egitasmoa garatu duen H-Enea Living Lab taldeko Eukene Barrenetxea edo Fagor Taldeko Aritz Otxandiano.
Bi ekitaldi, publiko osoari zabalik
Hiru eguneko egitarauaren barruan bi hitzordu izango dira herritar orori zabalik, eta Garaiako auditorioan egingo dituzte. Alde batetik, apirilaren 27an goizeko 11:00etan gobernantza ereduen inguruan egingo den aurkezpena. Hitza hartuko dute, besteak beste, Arrasateko Udaleko, Gipuzkoako Foru Aldundiko zein Euskal Energia Erakundeko ordezkariek.
Irekia izango den, baita ere, energia komunitateen inguruko mahai ingurua, apirilaren 28an. Mahaiaren bueltan izango dira, Ea herriko alkatea, Ekiola egitasmoko ordezkariak zein Goiener kooperatibako kideak. Parte hartzeko ezinbestekoa da aurrez izena ematea udal webgunean.
