Beilatokiaren kokapenari eusten dio San Felipe Elkarlaguntzak

Ignacio Zuloagako 2.atarian egin asmo dute beilatokia.

Erabakia "irmoa" dela nabarmendu du ohar bidez, "batzar nagusian botoen %73 ingururekin onartu baitzen", eta San Felipeko Gobernu Batzordeak lokala erosteko eskritura dagoeneko eginda daukala gaineratu du. Sinadura bilketaren harira, erakundeak dio iritzi oro errespetagarria dela, "baina oinarri sozial zabalak ematen dion legitimitatearekin, San Felipe Elkarlaguntzari bakarrik dagokio, ezarritako lege-esparruaren barruan, bere beilatokia non kokatu erabakitzea".

San Felipeko kide diren pertsona batzuek erakundetik kanpoko bideetatik aurkaratzeak "erakundearen eta hura osatzen dutenen aurka" egiten duela dio oharrak. "Izan ere, azken batzar nagusiaren erabakia ezeztatzen den bitartean, pertsona horiek gainerako bazkideak bezain behartuta daude ebazpen hau betetzera, gure estatutu sozialetan jasotzen den bezala. Elkartekide batzuek haien aurkakotasuna adierazi eta erabaki horren aurka bozkatu ahal izan zuten batzar berean, botoen ia 3/4ek emandako ebazpenaren lekuko presentzialak izanik, eta, orain, komunikazio- eta sinadura-bilketa kanpaina baten talde sustatzaileko kide izatea, hornitu garen prozeduretatik kanpo dago".

Era berean, San Felipeko bazkideen beilatokiaren kokapenaren aurkako "edozein oposizio legitimo" San Feliperen barruan garatu behar dela azpimarratu du erakundeak, "gure estatutu sozialek horretarako gaitzen dituzten bideei jarraituz".

Erdiguneko kokalekua, "ondo komunikatua"

Proiektatutako beilatokiaren diseinuak Osasun Sailaren aurretiazko onespena daukala adierazi du San Felipek. Lokalari eta inguruneari dagokienez, nabarmendu du 2. atariko hormarekin "mankomunatutako eremua" baino ez duela izango, "gaur egun okupatu gabeko merkataritza-lokal baten azpian dagoelako eta beste aldean merkataritza-lokal bat duelako mugakide".

Oinplano angeluzuzeneko lokal bat da, fatxada eta atari "zabal eta abegikorrekoa", senitartekoak, lagunak eta ezagunak hartzeko. "Bitartean, familiak hildakoa zaintzen du bere hiru beilatokietako batean, eta agur intimoen edo zeremonia zibil edo erlijiosoen beharretara ere egokitzeko gai da. Erdiguneko kokalekua dauka, ondo komunikatua, oinez minutu batera iristeko modukoa garraio publikoko bi geralekutatik, lau minutura gertuko aparkaleku publikoetatik, eta parrokiatik antzeko distantziara, San Frantziskotik 100 metrora dagoela ahaztu gabe. Gainera, eremu horretako udal-hirigintzako bilakaerak ibaiaren estaldura irekitzea eta oinezkoentzako bidea gero eta handiagoa izatea aurreikusten du".

"Izaera sozial nabarmeneko" ekipamendua

San Felipeko beilatoki bat "izaera sozial nabarmeneko" ekipamendutzat hartu behar da, bere bazkideen eta Debagoieneko gainerako biztanleen zerbitzura, milioi erdi eta milioi bat euro arteko inbertsioa eskatzen duena, erakundearen arabera. "Kopuru horien aurrean, azpiegitura horren bizitza edo erabilera 20 urtetik gorakoa izan behar da, eta, ziurrenik, zenbait hamarkada gehiago, dagozkien birmoldaketekin. Beraz, ezinbestekoa da begirada altxatzen saiatzea hileta-errituen etorkizuna ikusteko. Ondorioz, galde diezaiogun geure buruari nolakoak izango diren 2040ko hiletak. Eta 2060an? Zeremonia laikoak izango dira? Gertukoenen arteko topaketa intimoak bakarrik? Edo, besterik gabe, ezer ez?".

"Ziur asko", ez oso epe luzean, hiletek gaur egungo konfesio-konnotazioa galduko dutela adierazi du San Felipek, ezkontzekin gertatu den bezala. "Izan ere, 30 urtetan ezkontzak elizan %80 ospatzetik gaur egun 5etik 1 izatera murriztu dira. Hala ere, gaur egun, Espainiako hileten % 82k konfesionalak izaten jarraitzen dute, eta beste mota bateko hiletak, berriz, %18k".

Horri lotuta, honako hausnarketa egin du: "Arrasaten zergatik ez da lortzen hileta laikoen %18? Erantzuna da estalitako instalazio duin eta egokien falta. Hileta-ekintzen sekularizazioranzko eraldaketa saihestezina, ziurrenik, hasieran pixkanaka gertatuko da, eta gero, modu malkartsuan, instalazio duin eta egokiak izan eta sekularizatuagoak diren belaunaldi berriak zahartuz doazen heinean. Zantzu guztien arabera, 2040an hileta-elizkizunen erdia baino gehiago familia-zeremonia intimoak edo zibilak izango dira".

Beilatokiaren funtzioaz eta kokapenaz

Hasiera batean, erakundearen esanetan, beilatokiek prestatuko dituzte tarteko edukiera duten zeremonia-gelak. "Beilatokiak hildakoaren bela-funtzioa izateari utziko dio, eta senitartekoak eta gertukoak biltzeko eta gure maiteei modu duin, eroso eta seguruan agur esateko lekua izango da. Ez da soilik orain arte ezagutu ditugun beilatoki ezberdinak dituen tanatorio tradizionala, baizik eta topaketarako eta agurrerako lekua, parrokiak gaur egun betetzen duen funtzio berarekin. Horregatik, hirigunean kokatu behar dira".

Bestalde, Gipuzkoako hainbat errealitate jarri ditu eredu moduan. "Erdiguneko beilatokiak, etxebizitza-eremuetatik gertu daudenak, Donostian, Errenterian, Azpeitian eta Hernanin aurki ditzakegu; izan ere, udalerri horiek merezi izan dituzte erakundeen eta udal-ordenantzen oniritziak".

Beste instalazio edo negozio bat balitz, zer?

Gaur egun gutxi dira hileta zibila beste leku batean egiteko asmoa dutenak, San Feliperen arabera, eta "gehiengo handi batean", senideak San Joan Bataiatzailearen parrokian agurtzen dituzte arrasatearrek, elizkizun erlijiosoekin, erdigunean, ondo komunikatua eta irisgarria den elkargune eta agur-leku batean. "Hala ere, kokaleku horren inguruan, hainbat hamarkadatan zehar, haurrak, tabernak, musika eta jaiak aurkitu dira, eta, kasu askotan, hileta-elizkizun batekin bat etor zitezkeen", gaineratu du.

Gaur arte, dio, horrek ez zuela inor harritzen. "Orain, ordea, badirudi heriotza herriz kanpoko ateetatik erbesteratu behar zela bizilagun batzuen arabera. Beilatokiaren kokapenaren aurkako erreakzioa bera izango zatekeen taberna, arrandegi edo merkataritza-zentro bat balitz? Zorionez, gure gizarteak lege-esparrua, arauak eta udal-ordenantzak ditu, guztien onerako erabakiak hartzeko aukera ematen dutenak".

Erlazionatuak

Beilatokia, arrasatear guztien ahotan

Arrasate

Kokapenari desadostasuna adierazten dioten 1.055 sinadura jaso arren, San Felipe Elkarlaguntzak adierazi du erabakia "irmoa" dela, "batzar nagusian...
1.055 sinadura, beilatokiaren kokapenari desadostasuna adierazteko

Arrasate

"10 ordutan 1.055 sinadura batu ditugu, eta oraindik jendea galdezka daukagu", azaldu du Juan Mari Belategik, Ignacio Zuloagako bizilagunetako bate...

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.