2019an 183.413 lagunek erabili zuten zerbitzu hori eta 2020an, "pandemiaren eraginez", kopuru hori 103.100era jaitsi zen, hau da, 80.313 bidaiari gutxiago. Dena den, Arrasateko Udalak, autobus zerbitzua bermatu du, "nahiz eta bidaiari kopurua ia erdira jaitsi den eta 116.515 euroko defizita bere gain hartu".
"Gure helburua da herri barruan mugitzeko garraio publikoaren erabilera sustatzea, gizarte ongizateari begira zein ingurunearekiko begirune jasangarriaren ikuspuntutik, eta horri helduta, gaur egun martxan dugun zerbitzua babestu eta mantentzearen aldeko apustua egiten dugu, honen eraginkortasunean irmoki sinesten dugulako eta arrasatearrok, orain arte, zerbitzuarekiko harrera ona azaldu dutelako", azaldu dute Udaletik, gaineratuz "inoiz baino garrantzitsuagoa" dela herritarrentzat "onuragarria" den zerbitzua zaindu, mantendu eta indartzen jarraitzea.