Buenos Airesko (Argentina) Laurak Bat euskal etxean euskara irakaslea da Sebastian Amaya, eta, horrez gainera, literatura irakasle ere badihardu ikastetxe batean. Ikasketez psikologoa da Agurne Juldain eta Sarea Fundazioak Arrasaten duen Bidean gizarteratzeko zentroa du lantoki. Euskaraz berba egiteko gogoak bultzatuta ezagutu zuten apirilean elkar; harrezkero, zapaturo egin dute hitzordua, online euskaraz berba egiteko.
Mintzanet programaren bidez
Irabazi asmorik bako ekimena da Mintzanet; Maramara Taldea enpresak kudeatzen du, eta Eusko Jaurlaritzaren eta Gipuzkoako Foru Aldundiaren eta Donostiako Udalaren laguntza du. Euskaraz jarduteko aukera handirik ez duela-eta egin zuen Amayak ekimenarekin bat. "Nire birraitona eta birramona Euskal Herrikoak ziren; horrez gain, asko gustatzen zait euskara, eta gustura nago euskararekin. Ekimen oso baliagarria da, asko ari naiz ikasten, eta, gainera, lagun bat irabazi dut", dio Amayak, eta zera gaineratu du Juldainek: "Arrasateko Zahar Berri egitasmoan jardun izan dut aurretik, eta telebistan Mintzanet ekimenerako boluntarioak behar zituztela ikusi nuenean eman nuen izena, euskararen alde nire aletxoa jarri guran. Getxoko neska bat jarri zidaten bidelari eta ni Bidelagun rolean; harekin saio batzuk egin nituen, eta, geroago, beste bidelari bat pro-posatu zidaten, Sebastian. Eguneroko gaiei buruz egiten dugu berba, eta, gauden garaian, nola ez, pandemiaren hango eta hemengo gertakarien bueltakoak. Ez naiz euskara irakaslea ni; hortaz, gramatika zuzenketaren batzuk egiten dizkiodan arren, oinarrian, lagun arteko solasaldi informalak izaten dira".
Biek ala biek programaren onurak azpimarratu dituzte eta ekimenean parte hartzeko gonbidapena egin dute. "Astero ordu erdi bat ateratzea ez da zaila, eta euskaldun berriak eta euskaldun zaharrak, biak, irabazten ateratzen gara".
Asteburuan, Arrasaten elkartuta
Apirilean hasi ziren pantailaren aurrean astero elkartzen, eta aurreko asteburuan elkartu dira lehenengoz aurrez aurre; izan ere, azken bi hilabeteotan Lazkaoko Maizpide euskaltegi-barnetegian dagoela kontatu du Argentinakoak: "Etxepare Euskal Instituzioaren bidez ikastaro trinkoa jasotzen ari gara euskal diasporako hamaika lagun. Ikaragarria eta sinestezina da bizitzen ari garen esperientzia! Turismo handirik egiteko aukerarik ez dugu izan, baina euskara ikastea zen helburua, eta, duda barik, bete da!".
