Azaldu dutenez, ordaintzeko modu berri horrekin ez dituzte aintzat hartzen lan-hitzarmenean jasotako taulak eta ordainsariak, eta diskriminazioa sortzen da langile finko eta behin-behinekoen artean. "Aztertu ditugun nomina batzuetan langileen finkoen soldataren erdia jasotzen dute, berez, lan berdina egiten dutenean" azaldu du Maribel Alberdi Ausolaneko langile eta LABeko ordezkari denak.
Enpresak lan-hitzarmena betetzen ez zuela ikusita bilera bat egin zuten Ausolaneko ordezkariekin. Azaldu dutenez, enpresak ez zuen gaia berbideratzeko asmorik azaldu, eta, hori ikusita, Arabako, Bizkaiko eta Gipuzkoako lan-ikuskaritza epaitegietara eraman zuten gaia. Berriki jaso dute Arabako ikuskaritzaren erabakia, eta euren aldekoa izan dela azaldu dute.
Hori ikusita Bizkaiko eta Gipuzkoako epaitegiek bide bera hartzea espero dute, eta langileei zor zaien dirua ordaindu arte protestekin jarraitzeko asmoa azaldu dute. GOIENA Ausolanekin harremanetan jarri da gaiari buruz esateko dutena jakiteko, baina erantzunik ez ematea hobestu du Ausolanek.
