Fabrikak 2.000 metro karratuko azalera dauka, eta bi milioi eurotik gorako inbertsioa izan du. Automobilgintzako eta linea zuriko osagaiak eta piezak fabrikatuko dituzte, besteak beste; hala nola, txartel elektronikoak. Horren bitartez, etxetresna eletrikoen eta automobilen funtzioak kontrolatzen eta kudeatzen dira.
Queretarako plantak kudeaketa aurreratuko ekoizpen sistemak eta makineria ditu, Fagor Elektronikak gainerako instalazio guztietan dituenak. Enpresatik adierazi dutenez, inbertsio handia egin dute ekoizpen ekipoetan, baita eremua egokitzeko ere. Horrez gain, fabrikaziorako garbiketa protokoloetan eskakizun oso zorrotzak bete dituzte.
Nazioartera zabaltzen
Fagor Elektronikak aurrerapausoa eman du planta horren irekierarekin. Izan ere, indartu egingo du enpresaren nazioartekotzea. Gaur gaurkoz, ekoizpen plantak ditu Arrasaten, Bangkoken (Thailandia) eta Mexikon. Horretaz aparte, merkataritza presentzia du Alemanian, AEBetan, Singapurren, Hong Kongen eta Txinako Shezen eta Shanghai hirietan. Guztira, 500 langiletik gora ditu.