HEMEN DEBAGOIENA

Krisia ikuspegi feministatik aztertuko du Arrasateko Emakume Txokoak

Arrasateko Emakume Txokoak herriko emakumeen bizipenak jasotzeko kanpaina abiatu du. COVID-19ak eragindako alarma egoeran eta itxialdian emakumeek bizitakoak jaso nahi dituzte.

Sustatzaileen hitzetan, kanpainaren helburua, errelato guztiak kontuan hartuta, krisi egoera ikuspegi feministatik lantzea da. Parte hartzeko epea uztailaren 3an bukatuko da eta adin eta profil guztietako emakumeak animatu nahi dituzte ekimenera. Ekarpenak jaso ondoren, kontakizun bat egingo du Emakumeen Txokoak, eta aurretik emango die azken produktuaren berri parte hartzaileei.

Ekarpenak egiteko, hainbat aukera

Bizipenak, kezkak, ardurak eta Koronabirusak azaleratutako egoerak jaso nahi ditu Emakume Txokoak. Horretarako, krisiak emakumeen bizitzetan nola eragin duen galdetu nahi die parte hartzaileei. Besteak beste,  jendartean eta zerbitzu publikoetan azaleratu diren "gabeziak" eta emakumeen ongizateari dagokionez sumatu dituzten "hutsuneak" partekatzeko eskatu dute. Baina, zaintza lanak, telelana, langabezia, indarkeria egoerak, sareak, komunitatea, arrazakeria eta bestelako gaiak ere izan daitezke hausnarketen oinarri.  

Ekarpenak egiteko, formatua librea izango dela azaldu dute; testuak, bideoak, argazkiak edota olerkiak bidali ahalko dira. Gainera, ekarpenak anonimoak izan daitezke, eta bakarka zein taldean egindakoak. Mezuak WhatsApp bidez (618 20 62 33) edo posta elektronikoz  (emakumetxokoa@arrasate.eus) bidal daitezke eta baita 943 79 41 39 telefonora deituta ere.

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.