Trafiko aldaketa aipagarriak dira atzo goizean ezarri zirenak. Lehena, Gipuzkoa etorbidea berriro ere ibilgailuei irekitzea., Musakolatik erdigunerako norabidean. Bigarren aldaketa aipagarriena arrasatearren artean Villamparo moduan ezaguna den eremuan egin dute, Garibai kaleko 16. zenbakiko eraikiaren bueltan, alarma egoeran gune hori biribilgune bihurtu delako praktikan. Orain ezingo da Etxe Txikiak kaletik eremu horretara joan. Eta hirugarren aldaketa aipagarriena da Euskal Herria plazako buelta osoa norabide bakarrekoa dela aurrerantzean.
Era berean, Garibai etorbideak, Maalako biribilgunetik Biteri kaleraino, motordun ibilgailuentzat guztiz itxita jarraituko du, baita Grupo San Juaneko erreka bazterreko pasabideak ere. Biteri etorbideak norantza bikoitzarekin jarraituko du, Nafarroa etorbidea eta Garibai etorbidearen artean.
Behin behineko izaeraz, eta data zehatzik gabe
Udaleko brigadako langileak gaur goizean aritu dira aldaketa horiek guztiak margotzen eta seinaleztatzen. Baina aldez aurretik ez ziren aldaketa horiek iragarri, eta gidari batzuk galduta ibili dira egoera arriskutsu bat baino gehiago sortuz.
Aldaketok hirigintza batzordean adostu ondoren ezarri dituzte, betiere "ohitura berriak egonkortzeko" asmoz. Eta behin behinekoak izango dira. "Normaltasun berria finkatu ahala ikusiko dugu", aurreratu du hirigintza zinegotzi Ibon Arrupek.
TAO, 2021eko apirilera arte
Mugikortasunarekin lotura zuzena duen beste gai garrantzitsua bat da TAO sistema herri osora hedatzeko proiektua. COVID-19ak atzeratu egin du hori ere. "Pandemiak parte hartze prozesua atzeratu du eta espero dugu hiru hilabetea atzeratzea TAO herri osora hedatzeko epea. 2021eko apirilera arte-edo", aurreratu du Arrupek.