Duela lau urte eraman zituzten ezkurrak Aldundiaren jabetzakoan den Arizmendi mintegira, eta orain landatzeko unea iritsi da. "Ez dakigu nola moldatuko diren kimuak lursail berri honetara, baina uste dugu ondo egokituko direla. Bertako espezie bat da, bioaniztasuna ahalbidetuko duena , eta oso pozik gaude esku-hartze honekin" azaldu du Maria Ubarretxena alkateak.
Udaleko ingurumen teknikari Pello Garaik, abaritzak berezko dituen propietate batzuk zerrendatu ditu. "Gero eta gutxiago erabiltzen ditugu baliabide naturalak osasunarekin lotutako gaitzak sendatzeko. Zentzu horretan abaritzak erabilpen bat baino gehiago eskaintzen ditu. Adibidez, beherakoa geratzeko erabili izan da betidanik. Abaritzaren azalak taninoak ditu, eta horrek ahalbidetzen du beherakoa gelditzea. Gipuzkoan Udalatx inguruan dago soilik zuhaitz hau, eta erabilera hori ia desagertuta dago. Baina Araban eta Nafarroan ugaria da zuhaitz honen presentzia, eta medikuntza naturalerako erabiltzen jarraitzen dute". Narrua ontzeko eta gorri biziko tindagaiak egiteko ere erabiltzen da abaritza.
Aipatutako Bedoñako Uringain eremuan makil ilara bat jarri dute, abaritzarekin egindako heskai bat lortzeko. Lehen lursailak heskaiekin –seto– banantzen ziren, eta zuhaitz mota honekin heskaiak egin daitezkeen ikusi nahi dute. "Aplikazio posible izan daiteke abaritzarekin egindako heskaiak Arrasate erdiguneko parkeetan erabiltzea, barandak erabili beharrean" azaldu du Garaik.