Langileen egoeraren berri emateko, Debagoinenean kanpaina bat jarri dute martxan eta gaur goizean eskuorriak banatzen ibili dira herrian zehar. Beraien errealitatea honakoa dela salatzen dute: langileen herena baino gehiago ez da 1000 eurotara iristen, 140 pertsona zaintzeko bi erizain daude, 15 minutu dituzte pertsona bat altxatu, garbitu, jantzi eta pixoihalak aldatzeko, gizonezkoek lan egiten duten sektoreekin alderatuz, 6000 euro gutxiago kobratzen dute eta eguneko 90 minutuko atentzioa dute aiton amonek.
Arazo honen aurrean, ez direla geldi geratuko adierazi dute beste behin ere. Beraien borroka "emakume eta jendarte osoarentzat" dela diote eta lan eta bizi baldintzen benetako hobekuntzak lortu arte, kalean jarraituko dutela adierazi dute.