ELA sindikatuak esan du soldatak 2017tik ez direla igo, kontratazioak egiterakoan kontrola enpresarena dela, lan kargak handiak direla, langileen %30k behin behineko kontratuak dituztela eta lan osasunari dagozkion neurriak ez dituztela kontuan hartzen. Hori horrela, "lan hitzarmen duina" eskatzen dute.
Aita Menni, sinatu orain; Hitzarmena orain; eta Hitzarmenaren alde, Aita Menni borrokan bezalako leloekin atera dira kalera hango langileak. Elkarretaratzeak egin zituzten abenduan, eta orain, karabana zaratatsuak egiten hasi dira. Hori bai, negoziazio mahaiari bultzada berri bat ematea ez dute baztertzen. "Baina, proposamen zehatz baten inguruan negoziatzeko elkartuko gara bakarrik; eta ez aulkiak berotzeko", esan du Aita Menniko langile eta ELAren liberatu Txema Kortabarriak.
Era berean, Goiena harremanetan ipini da Aita Menniko arduradunekin gatazka honen gainean galdetzeko. Oraingoz, iritzirik emango ez dutela esan dute.