ALBISTEAK

Haurren paradisua den Txikilandia arrakastatsua izaten ari da beste urte batez

Arrasateko Gabonetako klasiko bat den Txikilandia parkeak atzo ireki zituen ateak. Hala, gaur eta bihar artean askotariko jolasak izango dituzte bertaratzen direnek zenbait eremutan. Antolatzaileak "pozik" agertu dira orain arte izan duten harrerarekin.

Lehenengo eguna pasata, goiz da balorazio bat egiteko, baina, haurrak disfrutatzen ari direla adierazi dute Txatxilipurdiko hezitzaileek, eta oraingoz arrakastatsua izaten ari dela gaineratu: "Lehenengo egunean, urtarrilaren 2an, ilara luzeak izan genituen Uarkape pilotalekuko sarreran, eta hasiera bikaina emanda, hala jarraitzen dugu gaur ere…", adierazi du Oihane Sanchez Txikilandiako arduradunak.

Askotariko aukerak

Zapatu iluntzera arte euskaraz ondo pasatzeko aukera ugari eskaintzen ari dira askotariko guneetan: tailerrak, esperimentazioa eta sormen txokoak, ipuin kontalariak, edo ikuskizuna bezalakoak: "Zenbait gune ditugu, urterokoak direnak, kantxa nagusia, esaterako. Bertan, iaz hasi genuen parkour gunea, puzgarriak, musika, karaokea… ditugu. Honekin batera, Uarkapen zehar ipuin txokoa, bi esperimentazio gune ditugu, horietako bat,  0-4 urte bitarteko haur eta gurasoei bideratuta dagoena, gazte gunea ere iaz hasi genuen indartzen eta aurten ere horretan ari gara…", adierazi du Sanchezek.

Berritasuna, 'Escape Room'-a

Hainbat nobedade ere badituzte aurten; esaterako, gaztetxo zein familiendako Escape room-a, Arrasateko historia ardatz duena. Itxaron zerrenda jarri dute gune honetan, haur asko gerturatu baitziren, atzo, jolas berria probatzera: "15-20 minutu inguruko proba bat da. Kontatzen da XV. Mendean Arrasate erre egin zutela, eta historia ezagutarazi nahi izan dugu. Ganboatarren eta oinaztarren bandoak zeudela, herria banatuta zegoela…, eta garai bateko estrategiak erabili eta bilatu beharko dituzte gela horretatik garaiz irteteko eta Arrasate salbatzeko", adierazi du Iker Agirre Txikilandiako arduradunak.

Erlazionatuak

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.