Goikobaluren bultzatzaile nagusienetakoa izan zan Jesus Mari Arzek, elkartearen hamabosgarren urtemuga zela eta, emanaldi herrikoi bat antolatu gura izan zuen, eta herriko hainbat talde kultural elkartu ziren emanaldi hura antolatzeko. Arzek Jose Mari Velez de Mendizabali fabore moduan eskatu zion Arrasateren historiaren gaineko antzezlan musikatu baten testua idazteko, Eskuak Elkarri izena jarriko ziona. Ordura arte herritarrak ziren asko antzezle bilakatu ziren emanaldi hartan, eta Doke Antzerki Taldea jarri zuten martxan.
