Arrasateko udaltzaingoaren plantillaren egoera “oso latza” dela iritzita, alkatearen partetik "udaltzainak kontratatzeko modua eta jarraitutako prozedura" salatu ditu EH Bilduk gaur egindako prentsaurrekoan.
Egoerak "arduratuta" eta fokua bi kontratazio kasu zehatzetan jarrita, pertsonal sailari txosten juridikoa eskatu diotela azaldu du Maider Morrasek. Atzo ERNEk egin bezala, salaketa egiteko txosten horren zain zeudela adierazi dute.
Gidabaimenik gabe
Adierazi dutenez, 2018ko urrian gidabaimena erretiratua zuen udaltzain bat kontratatua zuen udalak. Honen aurrean, udaltzainek beraiek salaketa bat jarri zutela azaldu dute eta alkateak emandako erantzuna salatu dute: "Salaketa jarri zuten kontratua baliogabetzeko eskatuz, legez kanpokoa zela, ez zelako baldintzetako bat betetzen. Alkateak ezetz erantzun du, egun baduela txartela eta kontratua indarrean mantenduko duela".
Curriculum bidezko kontratazioak
Bigarren kasuari dagokionez, orain 10 egun lanean hasi diren hiru udaltzainen kontratazioaren berri eman dute. Hiru pertsona horiek curriculuma "zuzenean" Arrasateko udalera bidaliz kontratu direla adierazi dute.
Gaineratu dutenez, oposizioari eta sindikatuei ezer esan gabe, hauen iritziaren kontra, eta inolako txostenik, ez justifikaziorik eman gabe egin dute: "Jendea curriculumak bidaltzen hasi zen udaletxeetara. Ander Garay-ri galdetu genion eta ziurtatu zigun gurean ere hala zela. Bai guk, bai Igor Urizarrek eta bi sindikatuek pertsonala hala ez kontratatzeko eskatu genion. Hau administrazioa da, ez enpresa pribatu bat".
EH Bildutik udaltzainen beharra azpimarratu dute, baina administrazioak kontratuak egiterakoan "berme batzuk ziurtatzea" exijitu dute eta gogorarazi dute pertsonala ezin dela "edozein modutan kontratatu, are gutxiago curriculum bidez".