Hileko hirugarren zapatua izanik, Baserritarren Azoka egingo dute Seber Altube plazan, azaroaren 16an. Hilero moduan garaiko produktuak erosteko aukera zabala izango da, eta horien artean, Euskal Herriko babarruna izango da, oraingoan, protagonista.
Arrasateko Udaleko Toki Garapen saileko Nerea Lazpiur eta Debagaraia Landa Garapeneko elkarteko kide Agurtzane Diaz gonbidatu dituzte Arrasate Irratiko gaurko, martitzena, Igo Autobusera! saiora.
Askotariko ekintzak
Askotariko ekintzak egingo dituzte zapatuko Seber Altubeko azokan: Euskal Herriko baba mota ezberdinen erakusketa, haurrentzako tailerrak eta Arrasateko Lanbide hastapeneko ikasleek prestatutako babarrun-dastaketa; horrez gainera, Eusko Label produktuen zozketa ere egingo dute azokan erosketak egiten dituztenen artean.
