Harrera solairuan, beirate handi bat egingo dute errekaren ondoko paretan eta 180 lagun ingururentzako edukiera izango duen auditorioa ere bertan kokatuko dute. Lehen solairuan Arrasate Musikaleko ikasleentzako gela guztiak jarriko dituzte, den-denak intsonorizatuz.
Bigarren solairua Goikobalu eta ballet taldearen egoitza izango da; lehen solairuak baino altuera gehiago du eta ondorioz aproposagoa da bi elkarte hauen jardunerako. Azkenik, aire libreko hirugarren solairu bat izango du. Bertan administrazio arloko langileen bulegoak egongo dira, beirazko estruktura baten barruan, eta baita aire-libreko kontzertuak egiteko gune bat, 100 lagun ingururentzako edukiera izango duena.
Maria Ubarretxena pozik azaldu da, aurreko agintaldiko "proiektu izarretako bat" forma hartzen ari dela ikusita, eta lanak 2020ko udarako amaituta egotea espero duela adierazi du.