Gipuzkoako Aldundiaren Adinberri fundazioak adindunen bizi-kalitatea hobetzea du helburu. Iaz, diru laguntza programa bat abiatu zuten, eta bertan, Hurkoa elkarteak adindunen hauskortasuna neurtzeko planteatutako proiektua izan zen aukeratuetako bat. Hauskortasun maila neurtzeko, adindunen osasuna, harremanetarako gaitasunak, autonomia maila, irisgarritasun arazoak eta egoera ekonomiko zein afektiboak hartu dituzte kontuan. Gipuzkoa mailako hauskortasuna neurtzeko hiru udalerri ikertu dituzte –Pasaia, Azkoitia eta Arrasate–, eta, bakoitzak bereizgarri propioak izan arren, denetan nahiko bizi-maila "onargarria" dutela ondorioztatu dute; hamarreko eskala batean zazpiaren bueltakoa.
Aurkezpena
Azterlanaren emaitzak atzo aurkeztu zituzten. Han izan ziren Amaia Azpiazu –Gizarte Ongizateko jarduneko zinegotzia–, Jose Ignacio del Pozo –Hurkoako zuzendari-kudeatzailea–, Bakarne Etxeberria –Hurkoako hauskortasun programaren koordinatzailea–, Rakel San Sebastian –Adinberri Fundazioko zuzendari-orokorra– eta Laura Gallo –Ikeiko proiektu arduraduna–. "Azterketa honi esker adinekoen egunerokotasunaren inguruko informazio gehiago jaso ahal izan dugu; beraz, aurrerantzean, gure helburua izango da Gizarte Zerbitzuak adinekoen egungo zein etorkizuneko beharrei erantzuna emateko egokitzea; modu horretara, guztien bizikalitatea bermatu eta hobetzeko, noski", adierazi zuen Gizarte Ongizateko jarduneko zinegotzi Amaia Azpiazuk. "Datuak ona izan dira, orokorrean, baina bakardadean dauden horiek, edo irisgarritasun arazoak dituztenek, neurriak behar dituzte".