Goya Sarien 33. edizioa izan da, eta animaziozko pelikula onenaren saria jaso du Amaia Remirezek, Un dia mas con vida pelikularekin. Albesek, soinekoa egin dio Reminezi, eta halakoa dela adierazi du goi joskintzako diseinatzaileak: "soinekoa gris kolorekoa da, kristalak ditu alboetan, bizkarraldea bistan kortxe detaile batekin…".
Ez da lehen aldia Albesek Remirez janzten duela, eta bien artean egindako lanarekin gustura geratu dela adierazi du. "Amaia Remirez, Cannes-erako soineko bila etorri zen, eta harreman polita sortu dela esango nuke. Halako momentuetarako aholku bila datoz, eta lehenengo aldian oso pozik geratu zenez, oraingoan ere etorri da. Erabaki genuen zerbait neurrira egitea, bion diseinua izango zena. Hiru aste lehenago etorri zen, eta bion sormen bat izan da".
Baster dendakoen jantzia
Publikoaren artean Debagoieneko beste diseinu bat ere ikusi ahal izan zen Goya sarietan, Bergarako Baster dendako Mariaje Ibañez estilistarena, hain zuzen ere. Esther Baquero estilistak zeraman soinean. Zine eta antzokietan egiten du lan Baquerok, eszena eta ikus-entzunezko arloko jantziak diseinatzen.