Besaide Mendizale Elkarteko zuzendaritza azalberritu egin da. Aurreko zuzendaritzakoek egindako deiak izan du erantzuna, eta pasa den asteko batzar orokorrean ofizialki finkatu zuten zuzendaritza berria. Hala, honako zortzi kide hauek osatzen dute: Eñaut Iturbe –presidentea–, Asier Uroz –presidenteordea–, Jokin Murgiondo –diruzaina–, Imanol Ibarra –idazkaria–, Jon Azkoaga –bokala–, Mertxe Exposito –bokala–, Iraitz Etxaburu –bokala– eta Olatz Igartua –ordezko bokala–. "Oso pozik gaude. Lantalde polita osatu da, eta lortu dugu jende berria erakartzea. Dei egin genuenean, esan genuen orain arte zuzendaritzan aritutako lagunon laguntzarik ez zaiela faltako. Euskaldunok ia beti betetzen dugu emandako hitza, aldamenean edukiko gaituzte laguntzeko prest, nahi duten beste", azaldu du elkarteko azken presidente Aitor Zubiagak.
Kargua hartu berritan, zera adierazi du Eñaut Iturbe presidente berriak: "Ateak zabalik izango ditugu jende eta ideia berriak sartzeko. Lehenik eta behin, aurreko zuzendaritzak egindako lana sakon aztertzea tokatzen zaigu, gure ekarpenak egiten hasi aurretik. Ilusioz gaude bide berriak egiteko eta gure helburuetako bat izango da ahalik eta jende gehienengana heltzea: haurrak, gazteak, emakumeak..."..