Hirugarren urtez jarraian, Aretxabaletako Galartza auzoko Zaloña baserritik iritsiko da txerria Santamasetara. Kixki izena jarri diote, eta bihar, abenduak 21, aurkeztuko dute, arratsaldeko zazpietan Arrasateko Plazan. Aurreko urteetakoen aldean, txikixeagoa da Kixki, baina 200 kilotik gora baditu hala ere, eta gainera atentzioa deituko du, itxura, ez baita betiko txerriarena; basurdearen antz gehiago dauka.
Protagonista izanik, askok eta askok berarengana gerturatu, argazkiak atera eta ukitu nahi izango dute eta joan-etorri guzti horiei aurre egiteko, azken asteetan lasai xamar, familiatik aparte eduki dute. Behar dituen zaintzak jasota, Santamasetako protagonista nagusia prest dago; orain, festa eta ondo pasatzeko gogoak bakarrik falta dira.
