18:00etan Udala plazan, Roberto, Emili eta Zaparen omenezko plakaren aurrean lore eskaintza eta hitz hartze labur bat egin zituzten, aurresku batekin eta txalaparta doinuekin lagundurik.
Ondoren, 19:00etan Kulturate aretoan ekitaldi politikoa egin zuten Iraitz Agirrek aurkezturik eta herritar ugari bildu ziren, areto nagusia txiki geratzeraino.
Ekitaldi hunkigarria izan zen, duela 40 urteko gertaera honetan Zapa, eta Robertorekin batera Guardia Zibilak tirokatua izan zen baina bizirik atera zen Kike Zurutuzaren hitzak Kulturatera gerturatu ziren guztiengana iritsi baitziren. Tamaina honetako ekitaldi batean hitza hartzen zuen lehen aldia izan zen gainera.
Marian Beitialarrangoitia EH Bilduko politikaria eta Espainiako Diputatuen Kongresuko diputatua ere bertan izan zen.
Ekitaldia osatzeko, berriz, inoiz argitaratu gabeak diren bideo labur batzuk ere emititu zituzten, duela 40 urte hilketa hauek salatuz Arrasaten egin ziren protesta eta manifestazio jendetsuen irudiak hain zuzen.
Amaieran, Petti abeslariaren kantuez gozatzeko aukera izan zen.
