Turismo txokoa ireki dute BAZen

Arrasateko, Debagoieneko eta Euskal Herriko informazio turistikoa eskaintzen duen txokoa ireki du Arrasateko Udalak Biztanleen Arreta Zerbitzuan, BAZ gunean. Victoriano Fuentes turismo zinegotziak azaldu duen moduan, orain arte ezer gutxi egin da Arrasaten turismoari begira, eta halako zerbaiten beharra zegoela aitortu du.

Arrasateko turismoaren gaineko webgunea amaitzen ari dira dagoeneko, eta horrekin batera, BAZ gunean turismoari lotutako zerbait egon beharko litzatekeela pentsatu zuen Udalak. "Turismo Bulegoa agian gehiegi da, pertsona bat egon behar delako arreta eskaintzen. Oraingoz, turismo txoko honekin hasiko gara, eta erantzun ona izaten badu, BAZ barruan bulegotxo bat irekiko genuke, eta langile bat jarri, datozenei arreta eskaintzeko", dio Fuentesek.

Hori hala balitz, arreta eskainiko lukeen pertsona horrek formazio txiki bat jasotzea aurreikusten dute, ezagutza minimo bat izan dezan.

Txokoari dagokionez, mota guztietako folletoiak daude, euskaraz, gaztelaniaz, frantsesez eta ingelesez, eta orain arte arrakastarik handiena izan duena Euskal Autonomia Erkidegoko errepideen mapa izan da, Fuentesen esanetan. Horrez gain, Natura Bideen Mapa edota Udalatxeko igoeraren inguruko informazioa duten folletoiak ere badaude.

Abuztuaren 3an ireki zuten, eta aurrerantzean, BAZ guneak duen ordutegi bera izango du turismo txoko honek ere. Hau da, abuztuan goizez, eta irailetik aurrera goizez eta arratsaldez.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.