Gizonezko ahotsen taldeak ibilbide oparoa daroa: hamar urtean abestutakoak bildu zituzten orain dela gutxi argitaratu zuten diskoan; horrez gainera, asko dira eskaini dituzten emanaldiak, Euskal Herrian, Granadan, Stockholmen...
Euskal polifoniako kantuak abesten hasi ziren arren, erlijiokantuekin osatzen dituzte azkenaldian errepertorioak, eta halaxe egin zuten Aste Santuan Erromara egin zuten bidaian ere. Lau kontzertu eman zituzten; horietako bat, Vatikanoan.
Erromara joan aurretik, baina, herrian ere emanaldi bera eskaintzea adostu zuten Udalarekin, eta halaxe egingo dute bihar, zapatua, 20:00etan, San Frantzisko elizan. Palestrinaren Adoramus te kantuarekin hasiko dira, eta Elberdinen Cantate Domino-rekin bukatuko dute; tartean izango dira Mendelssohnek eta Madinak konposatutakoak. Kontzertua doan da.