Eskolaren alde ezberdinak erakutsiko dituzte eta irakasleen, ikasleen eta eraikinaren argazki zahar asko batu dituzte, baita musikarekin eta kirolarekin lotutakoak ere.
Aprendices Eskola bera eta 33 urtez Zerrajerako eskola moduan funtzionatu zuen eraikinean egindako lana balioan ipintzea da Arrasate Zientzia Elkartearen helburua. Bertako kideek diote, Arrasateko ondarea galtzen dagoela ikusita, ezinbesteko jotzen dutela Zerrajerarekin lotutako hainbat eraikin edo gune zaintzea.
'Ez da kasualitatea'
Ez da kasualitatea izena ipini diote erakusketari. Izan ere Arrasate Zientzia Elkarteko kideek diote ez dela kasualitatea oraindik ere eraikin horrek irautea eta era berean ez direla kasualitatea, eskolak eman dituen etekinak edo Arrasateko kooperatiba mugimendua.
Eraikin berezia
Eraikina noizkoa den galdetuta, zehaztea ez dela samurra diote Arrasate Zientzia Elkartekoek. Izan ere, 1905ko plano baten agertzen da, baina eskola inauguratu, 1939ko urrian egin zuten. 1944an itxura aldatu zioten eta garai hartako arrazionalismo estiloan egin zuten.
Donostiako arkitektura eskolan egin zuten proiektuan jasota dago eraikin berezia dela oso, eta fatxada nagusia osatzen duten elementuen konposizio bitxia azpimarratzen dute. Esan moduan, bihar 18:30an inauguratuko dute erakusketa. Bisita gidatua ere egongo da.