Urteroko ohiturari jarraituz, Mondragon Unibertsitateko Goi Eskola Politeknikoaren San Pankrazio zaindariaren eguna ospatzeko, Arrautza Jaurtiketa Lehiaketa egin dute ikasleek. Helburua da unibertsitateko ikasle edo langileek tramankulu bat diseinatzea jaurtiko duten arrautza babesteko. Arrautza apurtu gabe urrunen jaurtitzen duenak irabazten du sari nagusia.
Saridunak
Hegaldirik luzeena Isopopotopotototo taldearena izan da, 20 metro, hain zuzen. Oier Balbas eta Ander Otegi dira taldea osatu dutenak. Hegaldirik politenaren saria Tresyemas taldearentzat izan da –Eder Sanz, Aitana Bahillo eta Cristina Melendez–. Azkenik, diseinurik onenaren saria Gorringo taldeak irabazi du –Lia Garai, Irati Cobo eta Ane Errazkin–.
Tramankulua diseinatzeko, tamaina ertaineko oilo-arrautza bat, kartoi mehea, soka eta ukipen-kola erabili dituzte.
Aurten 20 urte bete ditu lehiaketa honek, eta 88 ikaslek hartu dute parte, 32 taldetan banatuta.
