Ikusleen harrera beroa izan du 'La del Soto del Parral' zarzuelak

Umorea eta drama, biak nahastu ditu gaur estreinatu duten La del Soto del Parral zarzuelak Arrasateko Amaia antzokia ia goraino bete duen publikoaren gozamenerako.

XIX. mende erdialdeko Segovian kokatutako istorioa kontatzen du Izaskun Murgia Elkarte Lirikokoek Arrasate Musikaleko musikariekin batera landu eta estreinatu duten La del Soto del Parral obrak. Eta protagonisten esanetan nahiko zarzuela zaila izan arren, ikusleek nota oso ona jarri diete; horren adierazgarri, bukaerako txalo zaparrada luzea.

Protagonistek (batzuk paper oso komikoetan eta beste batzuk oso dramatikoetan) ederki asko bete dute beraien lana, eta taldean interpretatutako piezetan trebe ibili dira antzezleak. Gauza bera esan daiteke musikarien eta dantzarien kasuan, eta dekoratuak eta jantziak prestatzen azken hilabeteetan burubelarri ibili direnek ere aparteko lana egin dute. Publikoak, beste urte batez, erantzun ona eman dio zarzuelari, eta antzokia ia goraino bete da. "Oso hunkigarria izan da'', zioen ikusleetako batek obra bukatzean; aktoreen dramatizazio ona azpimarratu du beste batek.

Urtero bezala, gainera, elkartasunak ere izan du bere tokia zarzuelan: atsedenaldian Harreman elkartekoek sari bat  zozkatu  dute, eta txartelen bidez ateratako dirua Indian eta Mozanbiken dituzten proiketuetarako izango da.

Zarzuela ikusteko hurrengo aukera bihar, domeka, izango da, 19:30ean. Datorren astean besteb bi emanaldi egingo dituzte: hilaren 25ean, egubakoitza, 20:00etan; eta hilaren 26an, zapatua, 19:30ean.

Erlazionatuak

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.