Bost urte beteko dira laster Goienak, beste 20 komunikabiderekin batera, TOKIKOM, toki komunikabideen bateragunea, sortu zuela, komunikabide txikien panorama sendotzeko asmoz. Gainera, 25 urte ere badira, Arrasaten toki komunikabideon etorkizuna marrazteko ARKO Jardunaldiak egin zirela.
Bi urteurren horiek ospatzeko, TOKIKOM Jardunaldiak antolatu dituzte toki komunikabideek. Arrasaten elkartuko dira datorren astelehenean, edukietan, marketinean zein teknologian dituzten erronkei buruz jardungo dute, komunikazioaren munduko punta-puntako profesional eta enpresen eskutik.
Gainera, tokian tokiko komunikabideek euskararen transmisio katean betetzen duten papera ere aztertuko dugu, eta, lehen aldiz, TOKIKOM Sariak ere banatuko dituzte, komunikabide txikiotan urtean egindako portadarik, edukirik eta ikus-entzunezkorik onenak aitortzeko: "Toki komunikabideetan lan handia egiten den arren, sarritan tokiko publikoak baino ez du ikusten, eta sari hauen helburua egindako lan bikain horiek publiko zabalari ezagutaraztea da".
Jardunaldiok datorren astelehenean izango dira, azaroaren 14an, Arrasateko Garaia Berrikuntza Gunean. Informazio gehiago eta izen ematea, http://tokikom.eus/jardunaldiak webgunean.
