Momentu batzuetan euria egin zuen arren, doke txapelketa ez zuten alde batera utzi, eta giro polita izan zen goizean zehar Kondekuako jardinean. Herrian honezkero errotuta dagoen ohitura da doke txapelketa; izan ere, egubakoitzekoa XXXVI. edizioa izan da. SUDC taldeak antolatzen du urtez urte. Metalezko fitxak jaurti eta belarretan iltzatuta dagoen labanarengandik ahalik eta gertuen lagatzen saiatzean datza joko horrek.
Jokoak eta sardina erre usainak herritar ugari erakarri ditu, eta guztiek interes handiz jarraitu dituzte partidak. Azkenik, Txalaparta elkarteko ordezkariak izan dira txapeldun. Bigarrenak, berriz, Udalpe elkartekoak izan dira: "urtero bigarren egiten dugu" esan du Udalpeko ordezkari Agustin Elkorok. Parte hartzaileek nabarmendu dute txapelketa "ondo" joan dela, "problema barik" eta giro onean. Finalean 50-32 egin dute Txalapartak eta Udalpek.
Hirugarren egin duen elkartea Hamaika Gazte izan da. Guztira, herriko bederatzi elkarte gastronomikok hartu dute parte.
Udal ordezkariekin 'pikea'
Ohi den moduan, bukaeran Udaleko ordezkariak txapeldunen aurka aritu dira, eta kasu honetan ere Txalaparta elkartekoek irabazi dute Juan Ramon Mendieta eta Maialen Zabaleta zinegotzien aurka (40.24). Eurentzat doke txapelketan parte hartu duten lehen aldia izan da, eta pozik azaldu dira egindakoarekin: "lehenengo urtea izateko oso ondo joan da; datorren urtean seguru irabazi egingo dugula", esan du Mendietak amaieran. "Tartea ez da izan oso handia, eta horrekin geratzen gara", nabarmendu du bere aldetik Zabaletak. Azken honek txapelketan "giro polita" izan dela aipatu du.
