Oso partidu estua jokatu dute arrasatear eta kantabriarrek. Horren erakusle, laurden amaieretako emaitzak: 20-23; 42-43; 63-68.
Puntu gutxiko aldearekin baina atzetik joan ostean, sei minuturen faltan lortu du berdintzea MUk, 70na. Zirrara handiko minutuak izan dira. Eta lehenengo eztanda, laugarren laurdenaren amaieran: zortzi segundo falta ziren, eta hiru puntu atzetik Arrasatekoak. Kanpokoek falta behartu eta Zeziaga jaurtiketa libreetara. Lehena barrura, eta bigarrenean kale, nahita. Errebotea arrasatearrentzat, eta barrura. Nahi bezala atera da jokaldia. Lau segundoko azken jabetza Pielagosentzat: hirukoan huts, baina errebotean barrura; hortxe hortxe egon da, baina denboraz kanpo, epaileen ustez, hainbat kontsulta egin ostean. 81na, luzapenera.
Luzapenean, hamabost segundo faltan hiru goitik kanpokoak eta bi jaurtiketa libre alde; baina biak huts egin, errebotea arrasatearrek eta hirukoa barrura. 93na. Bigarren luzapenera.
Eta berriz ere azken segundoetara atzetik, estu baina atzetik, MUkoak. Eta oraingoan zorterik ez. Bi hiruko ahalegin huts, eta azkenean bikoa saskira; baina ez zen nahikoa: 106-107. Saririk gabeko lan handia arrasatearrena.
Pielagos taldeko 10 zenbakidun David Garcia izan da partiduko saskiratzaile onena, 33 punturekin; gertu, MUko Gorka Arejolaleiba, 32rekin.
