Greziak bere eredu ekonomiko eta soziala definitzeko eskubidea duela aldarrikatu dute Arrasaten

Greziako herriarekin elkartasuna! Troikari ez! lelopean egin dute elkarretaratzea greziar herriaren "duintasunaren eta demokraziaren" alde. Bertaratutakoek azaldu dute Greziako herritarrak eta bereziki greziar langileak, pentsiodunak edota etorkizuna "ebatsi" nahi dieten gazteak ez daudela bakarrik, euskal herritarrak "burujabetzaren eta justizia sozialaren borroka" konpartitzen dutelako. Greziar austeritatearen aurkako plataformak (Baleikek, EH Bilduk eta Irabazik) deitu du elkarretaratzea.

Greziarrak domekan, hilaren 5ean, hautestontzietara joateko deituta daude eta elkarretaratzean salatu dute azken hilabeteotan greziar gobernuak eta instituzio europearrek izandako negoziazioek erakutsi dutela krisi honetan jokoan dagoena ez dela "gai tekniko edo finantziero hutsa, jokoan dagoena eredu sozio-ekonomikoa" dela eta auzitan jartzen dela "demokraziaren muga".

Adierazi dute baita ere Europan eta munduan elkartasuna lehenestea nahi dutela, "mozkinak gurtu eta pertsonen aurkako hormak eraikitzen dituen Europar Batasun neoliberalaren aurrean".

Azken bost urteotako "austeritatearen" eraginez, greziar herriak "larrialdi humanitarioa" bizi duela eta eskubidea duela egoera gainditzen lagunduko dioten politiken inguruan erabakitzeko ere esan dute.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.