Udal eta Foru hauteskundeak 2015

Arrasateko EAJ: "Ez dugu aterik ixten, aukera guztietara gaude zabalik"

Arrasateko EAJk prentsa agerraldia egin du arrasatearrei erakutsitako babesa eskertu, taldea aurkeztu eta emango dituzten hurrengo urratsen berri emateko. Alderdi bozkatuena izanik, udalbatza berriaren eraketan jeltzaleak izango dira buru. Horregatik aste honetan bertan egingo dute lehen bilera bigarren zerrenda bozkatuena izan den EH Bildurekin: "Ez dugu aterik ixten, aukera guztietara gaude zabalik. Hori bai, beste indarren programak eta helburuek gureekin egin beharko dute bat ildo nagusietan behintzat", aurreratu du, besteak beste, Maria Ubarretxenak.

Maria Ubarretxenak gaineratu du akordioa izango dela euren ardatz nagusietako bat: "Arrasatearren beharrei aurre egiteko eta herritarren zerbitzura egoteko lan egitera gatoz. Parte hartzea, gardentasuna eta gertutasuna izango dira, batez ere, gure eguneroko lanaren oinarri. Guztion artean eta guztiekin lan egiteko gertu gaude". Izan ere, jeltzaleen helburua da Udal "sendo eta egonkor" bat lortzea Arrasaterendako. 

Bilera erronda

Eta zerrenda bozkatuena direnez, bilerak hasiko dituzte gainerako taldeekin: "Udalean ordezkaritza duten beste talde guztiekin elkartuko gara, boto gehien jaso dutenetik hasi eta gutxien jaso dituztenekin amaitu arte". Aste honetan bertan EH Bildurekin elkartuko dira eta gero PSE-EErekin, Baleikerekin eta Irabazirekin. Azkenik, Ubarretxenak adierazi du Udal "sendoa, plurala eta parte hartzailea" lortzeko egingo dutela lan: "Sentsibilitate ezberdinak dituen Udal bat gura dugu eta horregatik oso irekita gaude talde guztiekin lan egiteko". 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.