Arrasateko osoko bilkuren aretoa bete zuten herritarren, eragile sozialen eta politikari diren eta izandakoen babes zabalarekin egin zuten zapaturako deia: "Eskuak eman eta denak libre nahi ditugula ohiu laranja batez ozen esatera!".
Izan ere, elkarri eskuak emanez sortutako giza-katearen bitartez Bergarako epaitegia inguratu, eta 4/08 sumarioari dagozkion epaiketak bertan behera uzteko eskatuko dute, iritzita "euskal herritarron eskubide zibil eta politikoen aurkako erasoak direla", "duten izaera politikoa dela, lan politikoa egitea delako hauen akusazio bakarra".
"Jarduera politikoarengatik epaituak"
Salatuko dute, baita ere, "bere jarduera politikoagatik epaituak izaten ari direnak edo epaituak izango" direnen artean dagoela Aitziber Plazaola bergararra, beste 27 gazterekin batera.
Eta gogora ekarri dute zela Herriko taberna eta elkarteen aurkako Audientzia Nazionalaren sententziaren ostean, Auzitegi Gorenaren ebazpenaren zain daudela, eta haren menpe dagoela "lan politiko eta soziala egiteko diren" Arrasateko bost lokalen etorkizuna.
Prentsaurrekoa emateko azken legealdietako Arrasateko ezker abertzaleko alkateak elkartu ziren: Xabier Zubizarreta, Ino Galparsoro bera, hura kartzelan egon bitartean alkate izan zen Oihana Aranburu, eta gaur egungo alkate Inazio Azkarragaurizar.
Eta haien atzeko aldean izan zen, besteak beste, Ino Galparsororekin batera Arrasate gobernatu zuen zinegotzi taldea.
"Gorrotoari, alaitasunez"
"Beraien gorroto eta mendekuari, guk alaitasunez eta irriz erantzungo diogu, beraien gorroto eta mendekuari, guk musika eta dantzaz erantzungo diogu, beraien gorroto eta mendekuari, guk konpromiso laranjaz erantzungo diogu! Abenduaren 3an Bergarako epaitegia poztasunez, alaitasunez, eta konponbidearen aldeko norbanako laranjaz inguratuko dugu!", adierazi zuten.
Bukatzeko, elkartasuna adierazi zioten Jone Amezagari, "pankarta bat egitearen akusaziopean 18 hilabeterako espetxeratu nahi" duten gazteari.
