Berritasunei dagokienez aipatu lehen aldiz antolatu dutela kuadrillen arteko herri proba abenduaren 20rako; Biteri plazan izango da, 19:00etan.
Bigarren nobedadea izango da 35 urtez santamas egunean Arrasatera etorri den Iñaki Perurena harri-jasotzaile ohiari "omenaldi umila" egingo diotela, urteroko herri kirolen erakustaldiaren barruan, santamas egunean. 13:00etan izango da, Zaldibarko frontoian.
Bestalde, Albaola Itsas Kultur Faktorian San Juan baleontzia eraikitzen ari dira, XVI. mendeko galeoi baten erreplika historikoa. Hango arotzak Arrasatera etorriko dira arrasatearren aurrean pieza bat eskuz lantzera, XVI. mendean egiten zen moduan, opaitzur eta esku-zerraz. Hori izango da hirugarren nobedadea, abenduaren 27an, 10:00etatik 14:00etara, Seber Altube plazan.
Ezinbestekoak
Eta berritasunekin batera ezinbestekoa ezin falta. Horien artean daude bi txerriak. Abenduaren 21ean, 19:00etan, aurkeztuko dituzte Joseba Garitaonaindiaren baserrian hazitako Holan eta Merke, biak euskal txerri arrazakoak eta 110 kilo ingurukoak.
Abenduaren 22an, santamas eguna, artisau feria izango da beste behin. Berritasun birekin dator: batetik, Idoia Ibañezen ikasleek ehoziri lanak egingo dituzte; eta bestetik, Nafarroatik etorrita forja lanak egingo dituzte. Eta ezin falta ganadu eta hegazti feria ere.