Azpimarratzekoa da aurten lehiaketen parte-hartzea asko hazi dela; 396 partaide daude, iaz baino %19 gehiago. Aipatzekoa da ere, nazioarteko lehiaketan munduko txoko desberdinetako 14 akordeoi-jole lehiatuko direla; Alemaniatik, Txinatik, Espainiatik, Errusiatik, Eslovakiatik, Kazakhstandik, Poloniatik, Serbiatik eta Euskal Herritik datoz, hain zuzen, horiek.
Izen handiko epaimahaikideak
Urtero lez, txapela kentzeko moduko epaimahaia izango da: Euskal Herriko zein Europako eskarmentudun musikariak etorriko dira. Errusiako Friedrich Lips, Norvegiako Geir Dragsvoll, Stefan Hussong alemaniarra eta Iñaki Alberdi eta Ramon Lazkano euskaldunak dira epaimahaikideak, hain zuzen ere.
Lehiakortasuna baztertzeko jaialdia
Esan bezala, Hauspoz-ek antolatzen ditu lehiaketa hauek. Gipuzkoa Akordeoi Jaialdiari dagokionez, Hauspoz-en filosofia pedagogia eraikitzailearekin bat datorren jaialdia da. Helburua da, akordeoi ikasleek parte hartzea, lehiakortasunari garrantzia eman gabe.
Hauspoz-ekoek azaldu dutenez, garrantzitsua da ikasleek helburu sano batzuk ezartzea, beti ere, garaipenarekin itsutu barik. Horregatik, hain juxtu, da jaialdi bat eta ez lehiaketa bat. Hala ere, helburu txiki horiengatik, sailkapen bat egiteko hiru domina banatuko dira: urrezkoa, zilarrezkoa eta brontzezkoa. Hauspoz-eko Aitor Furundarenak dioenez, jaialdi horrek ematen dio bizia lehiaketa multzo horri, ikasle, irakasle eta gurasoen harremanak ematen duen aberasgarritasunagatik.