Alde batetik, taldeko arropa eta argazkien erakusketa jarriko dute Kulturaten, abenduaren batetik hogeira bitartean. 300 argazki baino gehiago jarriko dituzte ikusgai, baita 30 jantzi inguru ere. Astelehenetik ostiralera egongo da ikusgai, arratsaldeko 17:30etik 20.30era. Erakusketan gainera, taldearen ibilbidea laburbiltzen duen ikus-entzunezko bat egongo da, eta salgai jarriko dute abenduaren 9tik aurrera, 12 euroren truke.
Bestetik, Ane Albisuren eskutik, hitzaldia izango da abenduaren 11n. Tradiziozko jantziak izango ditu hizpide, eta dantzarako jantzien azken ehun urteetako ibilbidea aztertuko du, besteak beste.
Azkenik, Santamasak gertu direla eta, baserritar jantziaz gain, burko zapien erabilera sustatzeko asmoz, Xeli eta Ixiar Arregik ikastaroa eskainiko dute. Abenduaren 16an izango da, eta gainontzeko ekintza guztiak bezala, dohainik.
